दमौलीः निरन्तर वर्षाका कारण पानी थुनिएर बस्तीमाि जोखिम बढेको सूचना आए पछि जिल्ला समन्वय समिति प्रमुख शान्तिरमण वाग्लेले अनुगमन गर्दै समस्या समाधानका लागि स्थलगत रुपमा निर्देशन दिएका छन् ।

व्यास ९ गजौंडेमा वर्षाका कारण कजवेको पानी थुनिएको तथा व्यास ७ कलेस्तीमा नाला थुनिएर बस्ती जोखिममा परेको गुनासोपछि अनुगमन गरिएको जिल्ला समन्वय समिति तनहुँका प्रवक्ता गल गुरुङले जानकारी दिए ।

समितिका सदस्य केशबहादुर सुनार तथा प्रवक्ता गुरुङसहित व्यास ७ का वडाध्यक्ष सतिश न्यौपाने तथा व्यास ९ का वडाध्यक्ष सुरेश थापासहितको टोलीले अनुगमन गरेको थियो ।

त्यसक्रममा सडक डिभिजन कार्यालयका ईञ्जिनियर बोलाएर नाला र कजवेको व्यवस्थापन गर्न प्रमुख वाग्लेले निर्देशन दिएको प्रवक्ता गुरुङले जानकारी दिए ।