धनगढी दुवै मृगौला फेल भएका बाजुराको बुढीगंगा नगरपालिका, ब्रह्मतोलाका एक युवकले उपचारमा सहयोग गरेर आफ्नो ज्यान जोगाइ दिन याचना गर्नुभएको छ । आर्थिक अभावले थप उपचार गर्न समस्या भएपछि मृगौला रोगबाट पीडित १८ वर्षीय रामप्रसाद जैसी र उनका आफन्तले सहयोगको याचना गरेका हुन् ।
विगत आठ वर्षदेखि मृगौला रोगबाट पीडित जैसीको दुवै मृगौलाले काम गर्न छाडेपछि अहिले मानव अंग प्रत्यारोपण केन्द्र भक्तपुरमा उपचार भैरहेको छ । गरिबीका कारण परिवारले थप उपचार गराउनसक्ने अवस्था नभएपछि जोशी अस्पतालको शैय्यामा जीवन र मरणको दोसाँधमा हुनुहुन्छ ।
बुवाको पहिल्यै देहान्त भैसकेको र दुई दिदीको विवाह भइसकेको छ । आमाले उपचार गराउन सक्ने अवस्था नभएपछि उनका भिनाजु पदमराज रेग्मीले उपचार गराउँदै आउनुभएको छ । मृगौला प्रत्यारोपणमा धेरै खर्च लाग्ने भएकाले आफूले पनि व्यहोर्न सक्ने अवस्था नरहेको रेग्मीले बताउनुभयो । पीडितको परिवारका अनुसार चिकित्सकले जैसीको नयाँ जीवनका लागि मृगौला प्रत्यारोपण गर्नुपर्ने सल्लाह दिएका छन् ।
मृगौला प्रत्यारोपणका लागि १०/१२ लाखभन्दा बढी रकम लाग्ने बुझिएको आफन्तले बताएका छन् । ‘अहिलेसम्म सक्दो उपचार गराइरहेको थिएँ, मृगौला प्रत्यारोपणका लागि लाग्ने त्यतिधेरै रकम मैले पनि जुटाउन सक्दैन ।’ रेग्मीले भन्नुभयो, ‘मृगौला फेर्न सके उसले नयाँ जीवन पाउथ्यो ।’ मृगौला प्रत्यारोपणका लागि लाग्ने खर्च व्यहोर्नसक्ने अवस्था नरहेकाले जीवन रक्षाका लागि सहयोगको याचना गर्नुको विकल्प नभएको रेग्मीले बताउनु भयो ।
डाक्टरले स्वास्थ्यमा थप जटिलता आउन नदिन जतिसक्दो चाँडो मृगौला प्रत्यारोपण गर्न सल्लाह दिएको पीडितका आफन्तको भनाइ छ ।
आमाले उपचार गर्न सक्ने अवस्था नभएपछि उनका भिनाजु रेग्मी र आफन्तले उपचारमा सहयोग गर्दै आएका थिए । यसअघि भारतको बरेलीलगायत विभिन्न ठाउँका अस्पतालमा उनको उपचार गरिएको थियो ।
सहयोग गर्न इच्छुक व्यक्ति वा संघसंस्थाले रामप्रसादका भिनाजु पदम रेग्मीको मोबाइल नम्बर ९८६९६१३७६५ मा सम्पर्क गर्न वा उनकी दिदी कृष्णाकुमारी जैसीको नाममा सिद्धार्थ बैंक लिमिटेड ठीमी भक्तपुर शाखामा रहेको खाता नम्बर ०१७१५४१४३५० मा रकम जम्मा गर्नसक्ने छन् ।